TET - பத்து நாளில் தீர்ப்பு வெளியிடப்படலாம்?

TET – வழக்கு

பத்து நாளில் தீர்ப்பு வெளியிடப்படலாம்?

          இன்று காலை (16.09.2014) சென்னை நீதிமன்றத்தில் டெட் இடஒதுக்கீடு மற்றும் வெயிட்டேஜ் குறித்த வழக்குகள் விசாரணை நடைபெற்றது. 

          வழக்கு தொடுத்தவர்கள் சார்பாக ஐந்து முக்கிய வழக்குரைஞர்களும், அரசு தரப்பில் ஐந்து அரசு வழக்கறிஞர்களும் வாதிட்டனர். அமர்வு நீதிமன்றத்தில் மாண்புமிகு நீதிபதி. திரு. அங்கோத்ரி மற்றும் மனிஷ்குமார் ஆகியோர் வழக்கை விசாரித்தனர்.

1) இடஒதுக்கீடு வழக்கு

         இடஒதுக்கீடு தொடர்பான வழக்கில் இடஒதுக்கீடு என்பது அரசின் கொள்கை முடிவு. அதில் நீதிமன்றம் தலையிட இயலாது என வழக்கு வாதத்தின் போது நீதிபதி அவர்கள் தனது கருத்தை வெளியிட்டார். எனவே இடஒதுக்கீடு வழக்கில் நீதிமன்றத்தீர்ப்பு எவ்வாறு இருக்கும் என ஓரளவிற்கு நீதிபதிகள் கோடிட்டு காட்டியுள்ளனர்.

2) வெயிட்டேஜ் முறைக்கு எதிரான வழக்கு

               வெயிட்டேஜ்க்கு எதிரான வழக்கு இன்று அதிக நேரம் விசாரிக்கப்பட்டது. அப்போது அரசு வழக்கறிஞர் டெட் அறிவிக்கப்பட்ட தேதி, கீ ஆன்சர் வெளியிடப்பட்ட தேதி, கீ ஆன்சர்கள் சார்பான வழக்கு முடிவு அறிவிக்கப்பட்ட தேதி, நீதிமன்றத்தின் வழிகாட்டுதல்படி பழைய வெயிட்டேஜ் முறை (Ex: 90-104 Slab Method) மாற்றப்பட்டு தற்போது நடைமுறைப்படுத்தப்பட்டுள்ள அறிவியல் பூர்வமான வெயிட்டேஜ் கணக்கிடும் முறை குறித்த அரசாணை வெளியிடப்பட்ட தேதி, சான்றிதழ் சரிபார்ப்பு நடைபெற்ற தேதி, இதன் அடிப்படையில் தற்காலிக பட்டியல் வெளியிடப்பட்ட தேதி, கலந்தாய்வு நடைபெற்ற விவரம், தேர்வர்கள் பணிபுரிய வேண்டிய இடத்தை தேர்ந்தெடுத்தும் பணிபுரிய இயலாத சூழல் போன்றவைகள் குறித்து தெளிவாக கருத்துகளை எடுத்துவைத்தார்.

        மேலும் இத்தகைய வழக்குகளால் கிராமப்புற மாணவர்களின் கல்வி பாதிக்கப்படுகிறது எனவும், விரைவில் வழக்குகளை முடித்து தேர்ந்தெடுக்கப்பட்ட தேர்வர்கள் பணியில் சேர அனுமதி வழங்குமாறும் கேட்டுக்கொண்டார்.

         வெயிட்டேஜ் முறைக்கு எதிராக போராடிய வழக்கறிஞர்கள் ”12ஆம் வகுப்பில் பல்வேறு குரூப்கள் உள்ளன. எனவே ஒரு சில குரூப்களில் 600 மதிப்பெண்கள் வரை செய்முறை மதிப்பெண்கள் வழங்கப்படுகின்றன. ஆனால் அதே சமயம் கணிதம், அறிவியல் பாடங்கள் படிக்கும் மாணவர்களுக்கு இத்தகைய செய்முறை தேர்வு மதிப்பெண்கள் வழங்கப்படுவதில்லை. மேலும் அதிக மதிப்பெண் பெற இயலாத கிராமப்புற அரசு மாணவர்களுக்கு இந்த வெயிட்டேஜ் முறை எதிரானது. எனவே இந்த மாணவர்கள் ஆசிரியர் பணியில் சேர விழையும் போது பாதிக்கப்படுகிறார்கள்” என கூறினார். அப்போது மாண்புமிகு நீதிபதி. மருத்துவம், பொறியியல் போன்ற பாடங்களில் மாணவர்கள் சேரும்போதோ அல்லது இதர கல்லூரிகளில் சேரும்போதோ இத்தகைய கேள்விகள் இதுவரை எழவில்லையே என குறுக்கிட்டு எதிர் வழக்குரைஞர்களிடம் கேட்டார்.

         மேலும் எதிர் தரப்பு வழக்கறிஞர்கள் கல்லூரிகள் பலவும் ஒவ்வொரு வகையான பாடத்திட்டங்களை கொண்டுள்ளன. ஒரு சில கல்லூரிகள் குறிப்பிட்ட பாடங்களுக்கு செய்முறை பயிற்சி மதிப்பெண்கள் வழங்குகின்றன. ஆனால் அதே பாடங்களுக்கு இதர கல்லூரிகள் இத்தகைய மதிப்பெண்களை வழங்குவதில்லை. மேலும் முறையான கல்லூரிகளில் பயில்வோருக்கும், அஞ்சல் வழிக்கல்வியில் பயில்வோருக்கும் மதிப்பெண் பெறுவதில் வித்தியாசம் உள்ளது. எனவே கல்லூரி மதிப்பெண்களை வெயிட்டேஜ் முறைக்கு எடுத்துக்கொள்வதில் உள்ள சிக்கல்களை தெளிவாக எடுத்துரைத்தார். அப்போது மாண்புமிகு நீதிபதி ”டெட் மதிப்பெண்கள் தானே 60 சதவீதத்திற்கு கணக்கில் எடுத்துக்கொள்ளப்படுகிறது, 12 ஆம் வகுப்பு உட்பட இதர மதிப்பெண்களுக்கான வெயிட்டேஜ் மதிப்பெண்கள் 40 சதவீதத்திற்கு தானே எடுத்துக்கொள்ளப்படுகிறது?” குறிப்பிட்டு கேள்விகள் கேட்டார். மேலும் ”அரசு வெளியிட்டுள்ள அரசாணையில் ஏதேனும் குறை இருப்பின் அந்த குறைகளை களைந்து அரசாணை வெளியிட நீதிமன்றம் அறிவுறுத்துமே தவிர, இப்படித்தான் அரசாணை வெளியிடப்பட வேண்டும் என நீதிமன்றம் இறுதி செய்து அறிவிக்காது” என நீதிபதி தனது கருத்துரையில் கூறினார்.

  

      முற்பகலில் அரசாணை 71 க்கு எதிராக போராடிய வழக்கறிஞரை பல குறுக்குக் கேள்விகள் கேட்ட மாண்புமிகு நீதிபதி, பிற்பகலில் எதிர் தரப்பு வழக்கறிஞர் எடுத்து வைத்து திறமையான வாதக் கருத்துகளை முழுமையாகவும், மிகப்பொறுமையாகவும் கேட்டறிந்தார்.

           இன்றுடன் இவ்விரு வழக்ககள் சார்ந்த விவாதமும் முழுமையாக முடிவு பெற்றன. தற்போது இரு தரப்பு வழக்கறிஞர்களுமே வாதிட்ட தங்கள் சார்பான கருத்துகளை எழுத்து வடிவில் வழங்க வேண்டும். மேலும் தற்போது நடைபெற்ற வழக்கு விவாதத்தை பற்றிய கருத்துகளில் ஏதேனும் மாற்றம் இருப்பினோ அல்லது வேறு ஏதேனும் புதிய கருத்துகளை சேர்க்க வேண்டி இருப்பினோ அரசு தரப்பு வழக்கறிஞர் மற்றும் எதிர் தரப்பு வழக்கறிஞர்கள் இருவரும் எழுத்து பூர்வமாக தங்கள் கருத்துகளை நீதிமன்றத்தில் வரும் வெள்ளிக்கிழமைக்குள் தாக்கல் செய்யலாம் என நீதிபதிகள் அனுமதி அளித்துள்ளனர்.

        எனவே வரும் வெள்ளிக்கு பிறகு அடுத்த வார இறுதியிலோ அல்லது 10 நாட்களுக்கு உள்ளாகவோ நீதிபதிகள் தனது தீர்ப்பை வழங்குவார் என எதிர்பார்க்கலாம். தற்போது நடைபெற்றுள்ள கலந்தாய்வு அரசாணை 71 ன் படி நடைபெற்றுள்ளது என ஆசிரியர் தேர்வு வாரியம் வெளியிட்ட இறுதி பட்டியலில் தெளிவாக கூறியுள்ளதால் தேர்வர்கள் நீதிமன்ற தீர்ப்பை மிக ஆவலாக எதிர்நோக்கியுள்ளனர்.

சென்னை நீதிமற்த்திலிருந்து – பாடசாலை வாசகர்.