பாதுகாப்பு வேண்டுமென்றால் மாலை 6 மணிக்குள் கிளம்பிவிடுங்கள்: பல்கலை பெண் ஊழியர்களுக்கு அறிவுறுத்தல்!!!

தங்களது பாதுகாப்பு முக்கியம் என்றால் பெண் ஊழியர்கள் அனைவரும்  பல்கலைக்கழகத்தில் இருந்து மாலை 6 மணிக்குள் கிளம்பிவிடுங்கள் என்று பாபாசாகேப் பீமாராவ் அம்பேத்கர் பல்கலைக்கழகம் அறிவுறுத்தியுள்ளது.

லக்னௌவில் உள்ள பல்கலைக்கழகத்தின் துணை வேந்தர், பல்கலைக்கழகத்தில் பணியாற்றும் பெண் ஊழியர்களுக்கு அனுப்பியுள்ள சுற்றறிக்கையில் இவ்வாறு கூறப்பட்டுள்ளது.

மாலை 6 மணிக்கு மேல் பல்கலை வளாகத்துக்குள் எந்த காரணம் கொண்டும் பெண் ஊழியர்கள் இருக்கக் கூடாது என்றும், அவ்வாறு ஏதேனும் முக்கியப் பணிக்காக கூடுதல் நேரம் இருக்க வேண்டிய அவசியம் ஏற்பட்டால், முன்கூட்டியே அனுமதி பெற வேண்டும் என்றும் தெரிவிக்கப்பட்டுள்ளது.

பல்கலை வளாகத்துக்குள் பெண்கள் மீதான அத்துமீறல்கள் அதிகரித்து வருவதாக தகவல்கள் கிடைத்திருப்பதை அடுத்து இந்த உத்தரவு பிறப்பிக்கப்பட்டிருப்பதாக பல்கலைக்கழக செய்தித் தொடர்பாளர் கூறுகிறார்.

மேலும், உத்தரப்பிரதேசத்தில் பெண்களுக்கு எதிரான குற்ங்கள் கடந்த காலங்களை ஒப்பிடுகையில் தற்போது 15-17 சதவீதம் அதிகரித்திருக்கிறது. எனவே, பெண் ஊழியர்கள் பாதுகாப்பாக தங்கள் வீட்டுக்குச் சென்று சேரவும் இந்த அறிவுறுத்தல் உதவும் என்கிறார்.

பல்கலை வளாகத்துக்குள் தாங்கள் துன்புறுத்தப்படுவதாக பல பெண் ஊழியர்களிடம் இருந்து வந்த புகார் கடிதத்தைத் தொடர்ந்துதான் இந்த நடவடிக்கை எடுக்கப்பட்டுள்ளது என்கிறார்கள்.

ஆனால், இதனை கண்டித்துள்ள மாணவிகள், பல நேரங்களில் எங்கள் ஆய்வுப் பணிக்காக மாலை 6 மணிக்கு மேல் இருக்க வேண்டிய நிலை ஏற்படும். இது தவறான வழிகாட்டல். இதற்குப் பெயர்தான் பெண் உரிமையா? என்கிறார்கள்.

பெண் ஊழியர்கள் சொல்வது என்னவென்றால், எங்களை 6 மணிக்குள் வெளியேறும்படி சொல்வதற்கு பதில் பல்கலைக்கழகம் முழுவதும் கண்காணிப்புக் கேமரா வைத்து பாதுகாப்பை அதிகரிப்பதே சிறந்த விஷயம் என்கிறார்கள்