கல்லூரிகளில் தொழில்முறை ஆங்கிலப் பாடம் கட்டாயம்: உயர்கல்வி மன்றம் உத்தரவு.

தொழில்முறை ஆங்கிலப் பாடம் நடப்பு கல்வியாண்டிலும் கட்டாயம் பயிற்றுவிக்கப்பட வேண்டும் என்று மாநில உயர்கல்வி மன்றம் உத்தரவிட்டுள்ளது.

இதுகுறித்து தமிழ்நாடு உயர்கல்வி மன்றத்தின் உறுப்பினர் செயலர் கிருஷ்ணசாமி, அனைத்து பல்கலைக்கழக துணைவேந்தர்களுக்கும் அனுப்பியுள்ள கடிதம்:

தமிழகத்தில் உயர்கல்வித் துறையின்கீழ் இயங்கும் அனைத்து பல்கலைக்கழகங்கள் மற்றும் அதுசார்ந்த கல்லூரிகளில் 2020-21-ம் கல்வியாண்டில், இளநிலை பிரிவில் தொழில்முறை ஆங்கில பாடம் (Professional English ) அறிமுகம் செய்யப்பட்டது. இந்த பாடம் முதல் மற்றும் 2-ம் பருவங்களில் பயிலும் மாணவர்களுக்கு மட்டும் கற்பிக்கப்பட்டது. அதைத் தொடர்ந்து நடப்பு கல்வியாண்டிலும் தொழில்முறை ஆங்கில பாடத்தை முன்னோட்டமாக அனைத்து பல்கலைக்கழகங்களும் அமல்படுத்த வேண்டும். அடுத்த கல்வியாண்டில் (2022-23) 3, 4-ம் பருவத்தில் தொழில்முறை ஆங்கில பாடம் அமல்படுத்தப்படும். அதற்கான, பாடத்திட்ட வடிவமைப்புகள் குறித்து அனைத்து கல்லூரிகளும் கருத்து தெரிவிக்கலாம். இவ்வாறு அதில் கூறப்பட்டுள்ளது.

இந்த நடைமுறை அண்ணா பல்கலைக்கழகம், சட்டப் பல்கலைக்கழகம், தனியார் நிகர்நிலைப் பல்கலைக்கழகங்களுக்கு பொருந்தாது என்பது குறிப்பிடத்தக்கது.