நம்ம போன் நம்பர் மாறாது!

சிறிது நேரத்தில் அனைவரையும் கவலைக்குட்படுத்திய 13 இலக்க செல்போன் எண்கள் அறிமுகம் என்ற செய்தி தவறானது எனத் தெரிவ்யவந்துள்ளது.

ஜூலை 1ஆம் தேதி முதல் மொபைலில் இருந்து மொபைலுக்கு (M2M) தானியங்கி மூலம் செய்திகளைப் பரிமாறும் எண்கள் 13 இலக்கமாக மாற்றப்படும் எனத் தொலைத்தொடர்புத் துறை அறிவித்துள்ளது. அதனால், 10 இலக்க எண்கள் கொண்டவர்களுக்கு எந்தவிதப் பிரச்சனையும் இல்லை.

எம்2எம் எண்கள் என்பவை ஸ்வைப் இயந்திரங்கள், கார்கள், மின்சார மீட்டர் ஆகியவற்றிற்கான சிம் கார்டுகளில் பயன்படுத்தப்படுகின்றன.

இதை இந்தியாவின் மிகப் பெரிய தொலைத்தொடர்பு சேவை வழங்கும் ரிலையன்ஸ் ஜியோ , டெலிகாம் தொழில்துறை ஆகியவை உறுதிப்படுத்தியுள்ளன. எம்2எம் சிம் எண்கள் மாறும்போது அது எந்த வகையிலும் செல்போன் எண்களைப் பாதிக்காது என்று உறுதிபடுத்தியுள்ளனர்.

இந்த 13 இலக்க எண் மாற்றம் என்பது எம்2எம் தொடர்புக்குத்தான் என்று இந்த மாத ஆரம்பத்தில் தொலைத்தொடர்புத் துறை தொலைபேசி நிறுவனங்களுக்குத் தெரிவித்திருந்தது.

இது குறித்து தொலைத்தொடர்பு நிறுவனங்கள், ”வரும் ஜூலை 1ஆம் தேதி முதல் 13 இலக்க எண்கள் அறிமுகம் செய்யப்படும். அக்டோபர் 1ஆம் தேதி எம்2எம்மின் அனைத்து எண்களும் 13 இலக்கமாக மாற்றப்படும். இந்தப் பணி டிசம்பர் 31ஆம் தேதி வரை நடைபெறும்” என்று கூறின.

எம்2எம் என்பது வெவ்வேறு இடங்களில் இருந்து வயர்லஸ் மூலம் பேசும்போது உதவுகிறது. போக்குவரத்து மேலாண்மைத் தீர்வு, வாகனத் தணிக்கை, மின்சார மீட்டர்கள் போன்றவற்றில் பயன்படுத்துவதற்கு இந்த எண் சேவையை ஒதுக்குவதாகக் கூறப்படுகிறது.

எம்2எம் என்றால் என்ன?

இணையத்தில் இணைக்கப்பட்ட சாதனங்கள் மூலம் தகவல் பரிமாறிக்கொள்வது. இந்தச் சாதனங்களை இணையத்துடன் இணைக்க M2M சிம் கார்டு அவசியமாகிறது. இதனை வழக்கமான மொபைல்களிலும் பயன்படுத்தலாம்.