தமிழ்நாடு அரசு ஊழியர்கள் மற்றும் ஆசிரியர்களிடம் இருந்து 1.7.2021 முதல் 30.6.2026 வரை NHIS திட்டத்திற்காக பிடித்தம் செய்யப்பட்ட மொத்தத் தொகை, அந்த ஐந்து ஆண்டுகளில் திட்டத்தின் மூலம் மருத்துவ சிகிச்சை பெற்ற அரசு ஊழியர்கள் மற்றும் ஆசிரியர்களின் எண்ணிக்கை, அவர்களுக்காக வழங்கப்பட்ட மொத்த மருத்துவக் காப்பீட்டுத் தொகை, திட்டத்திற்காகப் பிடித்தம் செய்யப்பட்ட மொத்த கார்பஸ் தொகை மற்றும் ஊழியர்களுக்கு வழங்கப்பட்ட கார்பஸ் தொகை உள்ளிட்ட விவரங்களைக் கோரி தகவல் அறியும் உரிமைச் சட்டத்தின் கீழ் தமிழ்நாடு நிதித்துறையிடம் தகவல் கோரப்பட்டது..
இதற்கு பதிலளிக்கும் வகையில், சம்பந்தப்பட்ட விவகாரம் கருவூலம் மற்றும் கணக்குத் துறைக்கு மாற்றப்பட்டு, அதன் மூலம் சில தகவல்கள் வழங்கப்பட்டது.
அந்த RTI பதிலின்படி, கடந்த ஐந்து ஆண்டுகளில் அரசு ஊழியர்கள் மற்றும் ஆசிரியர்களிடம் இருந்து NHIS திட்டத்திற்காக ரூ.1,489.74 கோடி பிடித்தம் செய்யப்பட்டுள்ளதாகவும், கார்பஸ் தொகையாக ரூ.28.16 கோடி பிடித்தம் செய்யப்பட்டுள்ளதாகவும் தெரிவிக்கப்பட்டுள்ளது. இதில் ரூ.3.56 கோடி கார்பஸ் தொகை அரசு ஊழியர்களுக்கு வழங்கப்பட்டுள்ளதாகவும் தகவல் அளிக்கப்பட்டுள்ளது.
ஆனால், இதே காலகட்டத்தில் NHIS திட்டத்தின் கீழ் மருத்துவ சிகிச்சை பெற்ற அரசு ஊழியர்கள் மற்றும் ஆசிரியர்களின் மொத்த எண்ணிக்கை என்ன, அவர்களுக்காக மருத்துவக் காப்பீட்டு நிறுவனத்தால் செலவிடப்பட்ட மொத்தத் தொகை எவ்வளவு என்பது தொடர்பான விவரங்களை வழங்காமல், அந்தத் தகவல்களை United India Insurance Company நிறுவனத்திடம் பெற்றுக்கொள்ளுமாறு தெரிவிக்கப்பட்டது.
இதையடுத்து, சம்பந்தப்பட்ட தகவல்களைப் பெறுவதற்காக United India Insurance Company நிறுவனத்திடமும் தகவல் அறியும் உரிமைச் சட்டத்தின் கீழ் விண்ணப்பிக்கப்பட்டதாகவும், ஆனால் அந்த விவரங்களை தமிழ்நாடு அரசிடமே பெற்றுக்கொள்ளுமாறு அந்நிறுவனம் பதிலளித்ததாகவும் தெரிவிக்கப்பட்டுள்ளது.
இதனால், ஒரே திட்டம் தொடர்பான முக்கியமான நிதி மற்றும் பயனாளிகள் குறித்த புள்ளிவிவரங்களைப் பெறுவதில் அரசு துறையும், காப்பீட்டு நிறுவனமும் ஒன்றையொன்று சுட்டிக்காட்டும் நிலை ஏற்பட்டுள்ளதாகவும், இது NHIS திட்டத்தின் வெளிப்படைத்தன்மை மற்றும் கணக்குப்பொறுப்பு குறித்து கேள்விகளை எழுப்புவதாகவும் அரசு ஊழியர்கள் மற்றும் ஆசிரியர்கள் தரப்பில் அதிருப்தி நிலவுகிறது.
குறிப்பாக, ஐந்து ஆண்டுகளில் ஊழியர்களிடம் இருந்து ரூ.1,489.74 கோடி பிடித்தம் செய்யப்பட்டதாகத் தெரிவிக்கப்பட்டுள்ள நிலையில், அதற்கு இணையான காலகட்டத்தில் திட்டத்தின் கீழ் எத்தனை பேர் சிகிச்சை பெற்றனர், அவர்களுக்காக எவ்வளவு மருத்துவக் காப்பீட்டுத் தொகை வழங்கப்பட்டது என்ற அடிப்படைத் தகவல்கள் பொதுவெளியில் தெளிவாகக் கிடைக்க வேண்டியது அவசியம் என அரசு ஊழியர்கள் மற்றும் ஆசிரியர்கள் வலியுறுத்துகின்றனர்.
ஊழியர்களின் சம்பளத்தில் இருந்து தொடர்ந்து பிடித்தம் செய்யப்படும் NHIS தொகை எவ்வாறு நிர்வகிக்கப்படுகிறது, மருத்துவக் காப்பீட்டு நிறுவனத்திற்கு எவ்வளவு தொகை செலுத்தப்படுகிறது, திட்டத்தின் கீழ் எவ்வளவு தொகை மருத்துவச் செலவாக வழங்கப்படுகிறது என்பன உள்ளிட்ட முழுமையான நிதி விவரங்களை தமிழ்நாடு அரசு வெளிப்படையாக வெளியிட வேண்டும் என்ற கோரிக்கையும் எழுந்துள்ளது.
இந்த விவகாரத்தில் சம்பந்தப்பட்ட அரசு துறைகள் மற்றும் காப்பீட்டு நிறுவனம் வழங்கியுள்ள RTI பதில்களின் அடிப்படையில் முழுமையான கணக்குகள் வெளியிடப்பட்டால் மட்டுமே NHIS திட்டத்தின் நிதி நிலவரம் குறித்து தெளிவான நிலைப்பாட்டை உருவாக்க முடியும் எனவும் அரசு ஊழியர்கள் மற்றும் ஆசிரியர்கள் தரப்பில் தெரிவிக்கப்பட்டுள்ளது.
0 Comments:
Post a Comment
Dear Reader,
Enter Your Comments Here...